मटकीची उसळ, Sprouted moth sabzi

matakichi usal, matkichi bhaji, sprouted moth sabji, moth sabzi

मिसळीसाठी मटकीची उसळ करायची असल्यास करण्याची पद्धत जरा बदलते. 
ती पद्धत मिसळीसाठी उसळ इथे दिली आहे. 

मोड येण्यास वेळ - १४ तास 
करण्यास वेळ - २० मिनिटे 
मोड आलेली मटकी हवाबंद डब्यात फ्रिजमधे ५-६ दिवस टिकते. 

साहित्य:

मटकी - २ वाट्या (२ मोठ्या वाट्या ३-४ जणांना पुरतात)
ओलं खोबरं, कोथिंबीर, आलं, लसूण, जिरं 
कांदा - १
टोमॅटो - ऐच्छिक १
भिजवलेले शेंगदाणे - ऐच्छिक अर्धी वाटी 

गोडा मसाला / कांदा-लसूण मसाला / उसळ मसाला 

कृती:

• मटकी निवडून धुवून भिजत ठेवावी. साधारण ६ तास भिजल्यानंतर फुगते. पाणी काढून फडक्यात बांधून ठेवावी. विणलेल्या टोपलीत भिजलेली मटकी न बांधता ठेवली आणि ते टोपले बंद मायक्रोवेव्ह मध्ये नुसते ठेवून दिले - अर्थात उन्हाळी वातावरणात - तरी मोड येतात. 
• काहीजण मटकी भिजत ठेवताना चमचाभर मेथीदाणे त्यातच भिजवतात. 
• मोड आलेली मटकी हलकेच धुवून कुकरमध्ये जास्त पाण्यात वाफवावी. एक शिट्टी झाल्यावर लगेच वाफ मोकळी करून झाकण काढावे म्हणजे दाणे अख्खे राहतील. 
• मटकी शिजवलेले पाणी फेकू नये. ते उसळीत घालता येते किंवा त्याचे कळण बनवता येते. हे कळण खूप चविष्ट आणि पौष्टिक आहे. रेसिपी कडधान्यांचे कळण इथे दिली आहे. 
• कांदा, टोमॅटो, कोथिंबीर बारीक चिरावे. आले लसूण ठेचावी. जिरे, मिरची, ओले खोबरे आणि कोथिंबीर यांची पेस्ट बनवावी. 
• कढईत तेल गरम करून नेहमीची मोहरी+जिरं+हिंग+हळदीची फोडणी करावी. वाटणातील मिरच्या जास्त तिखट नसतील तर फोडणीत किंचित तिखट घालावे. 
• काळा मसाला टाकावा. कांदा-लसूण मसाला किंवा उसळ मसाला घालूनही चविष्ट लागते. 
• आलं लसूण पेस्ट आणि कांदा परतावा. 
• वाटलेला मसाला फोडणीत घालून लगेचच शिजवलेली मटकी फोडणीस टाकावी. फोडणी आणि मसाला सर्व दाण्यांना लागला पाहिजे असे ढवळावे.
• २ मिनिटे झाकण ठेऊन एक वाफ आणावी. नंतर दीड वाटी पाणी अंदाजाने टाकावे. 
• मीठ, धणे जिरे पावडर घालावी. चिंचोक्याएवढा गूळ घालावा. 

तीळकूट घरी असल्यास या उसळीत पाणी घालून शिजवताना चमचाभर टाकावे. त्यामुळे चव तर मस्त येतेच पण रसाला घट्टपणाही येतो.